Ranar cutar sukari ta duniya: Abubuwan da mutum ya kamata ya sani.

206

Dr. Ibrahim Danjummai Gezawa ,likitan masu fama da cutar sukari a asibitin koyarwa na Malam Aminu dake Kano (AKTH) ya bayyana cewa, karancin sinadarin da ke taimakawa jikin dan Adam wajen samar da ingantaccen suga a jiki na daya daga abinda ke haifar da cutar a jikin dan Adam.

Ya kara da cewa, yawan shan ruwa da bushewar makogwaro da yawan fitsari tare da sagewar wani sashi na jiki na daya daga cikin alamomin cutar suga a jikin dan Adam.

Dr. Gezawa yace cin abinci ko abin sha mai karancin sukari tare da yin amfani da ganyayyaki a cikin abinci na taka rawa wajen samar da lafiya a jikin mai fama da cutar, inda yace wani bincike da suka gudanar ya nuna cewar a kowanne sakan ashirin ana yankewa mutum guda kafa sakamakon cutar sikari.

Dr. Gezawa ya samu halarta shirin “Barka da hantsi” na gidan rediyon Freedom dake Sharada a cikin birnin Kano da kewaye.

Abdulkarim Sale daya daga cikin masu fama da cutar suga tsawon shekaru shida ya bayyana halin da ya samu kansa tare kuma da matakan da ya bi wajen kiyaye ka’idojin da aka kafa masa.

Ya ce da farko ya fuskanci matsaloli na zazzabi, yawan jin kishirwa, rama da yawan gajiya.

Ya kara da cewar yana fari jin wadannan alamu sai ya garzaya asibiti inda likita ya rubuta masa magunguna tare da bashi shawarwari na irin na’oikan abincin da ya kamata ya ci, matso jiki da sauran abubuwan da zai kare kansa.

Hanyoyin Da Za A Kaucewa Kamuwa Da Ciwon Sukari

Abdulkarim Sale ya yi kira ga masu fama da cutar sukari da su rika neman shawarwarin masana harkar lafiya, musamman ma idan suka ji sauyin yanayi a jikin su.

Taken ranar ciwon sukari na duniya dai a bana shi ne “Ciwon sukari da iyali” wanda yake Magana kan yadda iyali zasu taimakawa mai lalurar ciwon suga, yadda zasu kula da kansu da irin nau’ikan abincin da zasu ci.

Sannan ranar na nuni ga yadda al’umma zasu gani alamomin lalurar ciwon suga.

An dai fara gudanar da ranar ciwon suga ne a 1991 biyo bayan yawaitar masu dauke da ciwon suga da bukatar wayar da kan al’umma dangane da alamomi da yadda z’a kare kai daga kamuwa da ciwon.

Majalisar dinkin duniya ce ta ware wannan rana a shekara ta 2006 tun daga wannan shekara ne ake gudanar da ranar a duk duniya

Turawa Abokai

RUBUTA AMSA

Rubuta ra'ayinka
Rubuta Sunanka a nan