Home / Siyasa / Abubuwa Biyar Da Kwankwaso Ya Faɗa A Martaninsa Ga Kotun Koli

Abubuwa Biyar Da Kwankwaso Ya Faɗa A Martaninsa Ga Kotun Koli

Tun a 2015 bayan saukar Rabiu Musa Kwankwaso daga karagar mulki a matsayin gwamnan Kano, Kwankwason aka soma takun-saka da tsohon mataimakinsa Abdullahi Umar Ganduje wanda shi ne gwamnan jihar a halin yanzu.

Duk da yunkurin da jama’a da dama suka yi na sulhunta su abin ya ci tura.

A wannan makon ne dai Kotun Kolin Najeriya ta tabbatar da nasarar Gandujen a matsayin gwamnan Kano a zaben da aka yi na 2019

Jim kadan bayan hakan ne kuma Gwamna Ganduje ya karbi shugaban jam’iyyar PDP na Kano, Rabiu Suleiman Bichi, tare da wasu ‘yan kwankwasiyya, inda a wurin taron ya bayyana wasu abubuwa dangane da rikincinsa da Kwankwaso.

Shi ma Kwankwason ya mayar da martini dangane da wasu batutuwa da suka shafi hukuncin Kotun Koli da kuma dangantakarsa da ‘yan jam’iyya mai mulki a jihar.

Ga wasu daga cikin muhimman abubuwan da ya bayyana:

An yi wa Abba ‘fashi da makami

Sanata Rabi’u Musa Kwankwaso ya bayyana cewa sun tsayar da Abba zabe kuma ya ci zabe amma an yi musu fashi da makami.

Ya bayyana cewa shi a matsayinsa na dan siyasa, kwana yake yana godiyar Allah domin duk wata hujja ya bayar, amma abin da alkalai da INEC suka fada, shi ne ”zubar da girma”, inda ya kara da bayyana cewa kowa ya san gaskiya.

Ya bayyana cewa a tafiyarsu ta Kwankwasiyya a kullum idan suka samu, darajarsu na karuwa, haka zalika idan aka yi musu kwace ma darajar tasu na karuwa.

A yayin hirar, Rabi’u Kwankwaso ya bayyana cewa duk mutumin da yake jihar Kano ya san an zalunce su kan harkar zabe.

Zargin da ake yi wa Kwankwaso kan ‘son kai

A tambayar da aka yi masa kan cewa ‘yan bangaren adawa na zargin sa da yawan ‘son kai’ kuma abin da Kwankwaso ya ‘shuka ne yake girba’, Kwankwason ya mayar da martani kuma ya shaida cewa idan batun shuka ne ai shi ya shuka masu fadin wannan maganar kuma ga shi nan suna ta yaduwa da kasaita.

Ya bayyana cewa ”idan mafadin magana wawa ne majiyinta ba wawa bane.”

Ya bayyan cewa duk masu fadin irin wannan maganar ya yi musu komai a duniya, watakila ma a cewarsa wurin kyautatawa irin ta duniya daga ‘mahaifinsu sai shi’.

Ya bayyana cewa ‘wannan maganar ma bai kamata a amsa ta ba, don haka a bar jama’a su yi alkalanci”.

Dalilin da ya sa makusantan Kwankwaso ke barinsa

Dangane da wannan batu, Kwankwaso ya bayyana cewa bai cika son yi magana dangane da yaransa na siyasa ba domin duk wanda ya yi gaba to ya yi gaba amma duk da haka ya bayyana cewa dukkan masu barin jami’iyyar ‘so suke yi su zama kamar Rabiu Kwankwaso”.

Ya bayyana cewa saboda soyyayar da ake yi masa ko kasuwa ya shiga mai tumatir ko kayan miya zai iya miko masa domin ya je gida ya yi miya saboda soyayya ko da ba shi da ko sisi.

Ya bayyana cewa duk wadanda suka fita daga cikin Kwankwasiyya, babu wani laifi da ya yi musu, kuma har yanzu yana son su duk da sun fita.

Babban burina a rayuwa

A cikin hirar, Sanata Kwankwaso ya bayyana cewa babban burinsa a rayuwa shi ne duk wanda yake tare da shi tun daga kan dan aike ya daga shi ya zama babba, kuma babba kololuwa, kamar yadda ya bayyana a turance ya ce ”Chief Exectuive Officer”.

Ya ce a rayuwarsa yana so ya ga mutumin da yake tare da shi ya wadata, kuma har ya wuce shi a wajen wadata.

Hakuri a siyasa

A cikin bayanin nasa, ya bayyana cewa hakuri na da muhimmanci a siyasa. Ya ce hakuri da rage hassada na da matukar muhimmanci, inda ya bayar da misali da cewa idan Allah ya ba mutum abu zai yi murna, shi ma Allah zai ba shi wata rana.

Ya bayyana cewa duk wadannan rigingimu da suka taso a halin yanzu, a wurinsa ba su da amfani ko kadan.

Daga karshe Rabi’u Musa Kwankwaso ya bayyana cewa ba shi ya shirya wadannan rigingimun ba, amma a cewarsa, ‘shi shugaba na cike da shiga hatsari na abin da ba ka ce ba a ce ka ce”.

BBC Hausa

About Buhari Abba Rano

Buhari Abba Rano is a Skilled and News-Oriented Journalist With a Vision to Provide Fair, Fresh, Prompt and Truthful News.

Check Also

Ni da Obasanjo mu ka kuɓutar da ɗaliban babbar kwalejin gandun daji ta Afaka – Sheikh Gumi

Fitaccen malami Sheikh Ahmad Gumi, ya bayyana rawar da shi da Tsohon Shugaban Kasa, Olusegun …

Leave a Reply

Your email address will not be published. Required fields are marked *